Þá er hún loksins komin á Ravelry

Já þetta tókst að lokum, peysan góða er komin inn á Ravelry. Lína er loksins tilbúin. Ég er mjög sátt við útkomuna og er mjög spennt að sjá hana prjónaða í hinum  ýmsu útfærslum. Spennandi. Ef þú vilt fá að kaupa uppskriftina hjá mér þá sendi ég þér hana um leið og greiðsla hefur borist. Sendið mér email á netfangið: gudnymh@gmail.com

Lína

Ekki veit ég hvers vegna í ósköpunum myndin kemur alltaf á hlið hjá mér. Hún snýr rétt þegar ég vel hana en svo snýst hún alltaf á hlið þegar ég set hana inn. En hvað um það nú er loksins komin uppskriftin að peysunni góðu sem ég kýs að kalla Lína. Hún er með kaðla sem minna mig á flétturnar hennar Línu og svo er hún með fullt af láréttum línum í stroffi og hálsmálinu. Nú er uppskriftin tilbúin til útgáfu og getur hver sem áhuga hefur fengið hana hjá mér gegn heilum 900 isk. Ég er að vinna í því að koma henni inn á Ravelry og er það alveg að takast.

Ég er mjög sátt við útkomuna og stolt af þessari peysu sem er búin að vera í hausnum á mér í um það bil 2 ár.

Þessi er líka á hvolfi, nú held ég að ég þurfi að tala við Jóhönnu systir, ég játa mig sigraða í þessu.

Afgangar

Þetta eru litirnir í næstu peysu, þeir koma úr körfunni góðu sem er full af afgöngum. Þetta er mestmegnis Textílgarn en líka Höjland frá Isager og Alpaka 2 frá Isager. Ég er þegar komin með mynd af peysunni í hausinn á mér og eitt verður uppgefið og það er: RENDUR.

Hér er ég svo byrjuð á stroffinu. Það er tvær sléttar og svo þrjár garðaprjón á milli. Fyrsta röndin hefur litið dagsins ljós og svo verður prjónað eftir tilfinningu. Stroffið er á prjóna nr. 3 og svo skipti ég á prjóna nr. 3,5. Nú er ég spennt að halda áfram og sjá útkomuna.

Hekluð lopapeysa

Þá er mín fyrsta heklaða lopapeysa komin af nálinni. Ég er bara nokkuð sátt við hana. Hefði kannski mátt vera aðeins stærri en ég toga hana bara og teygi þegar ég fer að nota hana. Hún er hekluð úr einföldum plötulopa á nál nr. 5,5 og með hálfstuðlum fram og til baka. Kraginn var ljótur og ég lagaði hann, saumaði stykki úr honum svo hann varð meira standandi eins og ég vildi hafa hann. Ég var með mynd af þessari peysu í hausnum á mér og úrkoman varð bara nokkuð lík myndinni í hausnum. Mig langar strax að gera aðra og hafa hana aðeins stærri og jafnvel með tveimur litum. Sjáum til þegar hekluandinn kemur yfir mig aftur. Því miður er myndin af þreyttri kennslukonu og húsmóður eftir langan dag en svona er maður bara og þarf ekkert að fela það.

Hausthjólaferð

Fórum í dag í dásamlegu veðri að hjóla. Haustlitirnir eru svo fallegir núna og skemmtileg að vera úti. Lilja hjólaði 7 km með okkur og var rosalega dugleg þrátt fyrir smá rok.

Svo er nú reyndar margt á prjónunum um þessar mundir og koma myndir fljótlega af því. Ég er núna að keppast við að klára peysu handa Laugu svo ég geti prjónað á mig peysu. Langar í tvær á mig en hugsa að ég byrji á lopapeysunni sem er í hausnum á mér fyrst. Meira um það seinna!

Þriggjadagapeysan

Þessa peysu prjónaði ég á þremur dögum í sumarbústað núna rétt áður en ég byrjaði að vinna. Þetta er úr einföldum plötulopa og svo er blái kanturinn úr léttlopa. Mér finnst hún hafa heppnast mjög vel og er uppskriftin upp úr mér eins og flestar eru sem ég geri núna. Lilja Katrín er mjög ánægð með hana eins og sést á neðri myndinni og vonandi verður hún mikið notuð.

Fín og sæt eins og alltaf!

Dásamlegur sumardagur!

Hér er ég byrjuð á sjali sem er úr silki-ullar garni frá Textílgarni. Ég prjóna það tvöfalt og á prjóna nr. 5. Mynstrið er Lonely tree shawl frá Ravelry en ég breytti því aðeins, betrumbætti það aðeins eins og ég vildi hafa það.

Svo er það annað verkefni, mér finnst svo gott að hafa tvennt á prjónunum í einu. Þetta er líka mynstur frá Ravelry og heitir Elise shawl. Þetta er mjög skemmtilegt að hekla en það virðist vera flókið í fyrstu en er það alls ekki. Garnið er eins og sést á myndinn Höjland frá Isager og liturinn ljósbleikt. Ég á tvær dokkur og ætla bara að klára þær og sjá hvað það verður stórt.

Mikið rosalega urðum við glöð í dag þegar sólin loksins lét sjá sig. Það var allt dregið út og sundlaugin blásin upp, sólarvörnin borin á og prjónarnir voru að sjálfsögðu ekki langt undan. Svo kom ekkert annað til greina en að borða úti á palli og áttum við þennan ljúffenga fisk sem var afgangs í gær þegar Ólöf og Axel komu í mat til okkar. Auðvitað gerðum við aftur forréttinn sem við vorum með í gær og Jóhann var mjög glaður með hann enda í miklu uppáhaldi hjá honum. Frábær dagur í alla staði. Fleiri svona takk!

Nammi namm! Þetta er reyndar ekki rauðvín í glasinu heldur Ribena safi.

Sólstólar

Þetta eru sólstólarnir sem mamma og pabbi gáfu okkur, þau voru hætt að nota þá hjá sér. Eftir veturinn voru þeir orðnir ansi sjúskaðir og gráir, búnir að standa úti í allan vetur. Mig langaði svo að fá þá í stíl við nýju húsgögnin svo ég ákvað að mála þá hvíta. Ég er búin með annan og er hæst ánægð með útkomuna.

17. júní

Þjóðhátíðardagurinn var í gær. Við fórum í bæjarferð eins og venjulega á þessum degi. Það er alltaf gaman að hitta fólk og horfa á mannlífið. En mikið rosalega fannst mér kalt og nöturlegt í gær. Ég var lengi að ná úr mér kuldanum eftir að ég kom heim. 

Eini sumardagurinn

Loksins gat ég setið úti á föstudaginn síðasta. Þá kom smá sólarglæta og ég var ekki lengi að prófa nýju garðhúsgögnin og skella mér út með prjónana. Þau eru auðvitað algjört æði og vonandi getum við notað þau oftar í sumar en þetta eina skipti. Ég er að byrja á sjali sem ég prentaði út af Ravelry og heitir Lonely Tree Shawl. Ég er að gera það úr Alpacka 2 sem fæst í Ömmu Mús í Ármúlanum. Ég held að ég þurfi að lengja mynstrið því það er gert fyrir miklu grófara garn en ég er með. En mér líst samt mjög vel á hvernig þetta byrjar, það lofar góðu!

Ég fór um daginn í heimsókn til Önnu í Textílgarni og verslaði smá í poka. Ég fell alltaf í stafi þegar ég kem til hennar, mig langar að eiga allt garnið hennar. Þetta eru dásamlegir litir og undurfagurt garn á góðu verði. Ég stóðst ekki þetta bleika fína ullar og bómullargarn og ætla ég að gera peysu á Lilju Katrínu úr þessu.

Svo erum við að rækta á pallinum hjá okkur í þessum fína kassa sem tengdapabbi smíðaði handa okkur. Við erum með radísur, kál, jarðaber og timian. 

Nýju garðhúsgögnin

Um síðustu helgi keyptum við okkur garðhúsgögn á pallinn. Við fengum mjög gott verð í Húsasmiðjunni, það var 20% afsláttur af öllu og við skelltum okkur á þetta sett. Við keyptum líka bekk sem ég þarf að mála hvítan í stíl við hitt. Svo fórum við í Ikea í dag og keyptum plöntur á pallinn og í beðin. Ég valdi hádegisblóm í beðin og Sýprus í tvo potta.

Þetta er svo hindberjarunni sem okkur langar að prófa og sjá hvort að verður að einhverju hjá okkur. Ég keypti líka 5 jarðaberjaplöntur og setti í gróðurkassann okkar. Svo sáðum við basil í gluggann þannig að það er allt orðið vel grænt hjá okkur.

Boostkvöld

Allt í einu langaði mig svo mikið í boost í kvöld. Ég var búin að háma í mig prins póló og djúp og fannst komið nóg. Í þessu er AB mjólk, trópí, Superberries safi, vatn, frosin jarðaber, banani og frosin bláber. Namm, namm þetta var svo gott!

 Enda kláruðust glösin fljótt og allir sáttir.

Svo er það lopapeysan sem ég er búin með, hún heppnaðist mjög vel og ég er farin að nota hana. Mig langaði í einlita peysu og hún varð að vera hvít. Ég notaði láréttar lykkjur í stroffið og hálsmálið og svo kaðla eins og eru gerðir í Samlebånd peysunni frá Geilsk. Hún er hönnuð um leið og hún var prjónuð og passar fullkomlega á mig.

Ég setti svo skeljatölur sem ég átti. Kostnaðurinn við þessa peysu var um 2000 kr, fyrir utan tölurnar, ég fór með 8 dokkur af léttlopa í hana og prjónaði á prjóna nr. 4,5.

Nýleg prjónaverkefni

 Hér er nýjasta verkefnið. Lopapeysa fyrir sumarið, það er nú alveg nauðsynlegt. Það er skömm frá því að segja að allar lopapeysurnar mínar eru orðnar götóttar og gamlar, svo þetta er nú eiginlega nauðsyn frekar en ánægjuprjón. En ég var alveg ákveðin í að hafa hana einlita og hvíta. Ég er með einhverja hugmynd um hvernig efri parturinn á að vera, en samt ekki fullmótað ennþá. Kemur í ljós....

Þessa húfu prjónaði ég á LK og er hún í stíl við peysuna samlebånd frá Geilsk. Þetta er úr Litlu prjónabúðinni sem ég hef alltaf gaman af að heimsækja. Ég set inn myndir af peysunni við tækifæri. Húfuna skáldaði ég en þó með hliðsjón af húfu sem er á Ravelry.

Þessa peysu prjónaði ég fyrir nokkru og er farin að nota þó að ég sé ekki enn farin að setja tölur á hana (samt búin að kaupa þær, þetta heitir framtaksleysi). Þetta er eftir uppskrift frá Ysolda Teague sem ég keypti á netinu og heitir Coraline. Ég notaði garnið frá Textilgarn, einfalt og á prjóna nr. 3,5. Ég er mjög ánægð með hana, létt og lipur.

Sumar og sól

Loksins Loksins kom sumarið hjá okkur. Það var bongóblíða um hvítasunnuhelgina og auðvitað eyddum við helginni á pallinum hjá okkur. 

LKG var í sínu fínasta pússi, í kjól með glimmerermar og perluhálsfesti. Það dugar ekkert minna þegar sólin lætur loksins sjá sig eftir langan vetur.

Svo mætti Solla Stirða og vökvaði grasið hjá okkur

Þetta er jarðaberjaplanta sem ég er að vona að lifni við. Hún var í brotnum kassa af svölunum okkar síðan í fyrrasumar. Við fengum þá nokkur ber og þau voru safarík og góð.

Þetta er spínatið okkar sem ég sáði í bakka og hef geymt í bílskúrnum hingað til. Ég leyfði því að baða sig í sólinni á mánudaginn og ég held svei mér þá að það hafi stækkað. Svo bráðum ætla ég að kaupa kassa og setja á pallinn og umpotta öllu spínatinu  og rucola og fleiru sem ég er að reyna að rækta.

Auðvitað var prjónað og prjónað. Þetta er bláa peysan sem er alveg að verða tilbúin. Ég stefni á að klára hana áður en ég byrja að vinna í búðinni. Þá ætla ég nefnilega að kaupa mér í Isager peysu!!

JÁG kom heim í smá stund eftir fótbolta í Egilshöll.

Þetta er svo LKG með pabba sínum að lesa áður en hún fór að sofa. Greinilega spennandi bók!!

Bláa peysan

Þetta er bláa peysan sem er í vinnslu núna. Reyndar er hún búin að vera ansi lengi í vinnslu en það er svo margt annað sem ég er að gera að hún mjakast smátt og smátt. Nú langar mig að reyna að klára hana áður en ég fer að vinna í sumar í Ömmu Mús. Já ég er búin að fá sumarvinnu þar og er alsæl með það að vera innan um fallega liti og garn allan daginn. Ég ætla að setja inn fleiri myndir af þessari en það tókst illa að taka myndir, var reyndar bara með símann minn núna. Ég kannski dreg fram myndavélina við tækifæri og mynda hana betur. Þetta er mín hönnun og er hún undir áhrifum frá Helgu Isager. Ég fór á námskeið hjá henni sl. haust og hún hjálpaði mér að reikna út í þessa peysu. Ég var með í kollinum hvernig hún átti að vera og er ég ánægð með útkomuna. Ég vona að hún endi eins flott og ég hef hana í kollinum.

haustgula peysan

Þetta er haustgula peysan sem ég prjónaði á LK fyrr í vetur. Hún er algjört æði, passaði svo flott á hana en er því miður orðin of lítil á hana núna.

Ég notaði garn frá textilgarn.blogspot.com og passaði það fullkomlega. Uppskriftin er eftir mig en verður hægt að fá hana fljótlega á textilgarn.blogspot.com.

Uppskriftin er fyrir 2-3 ára og er dásamlega létt og klæðileg.

endurvinnsla

GM átti peysu, hneppta jakkapeysu sem var með blettum í og orðin of lítil á hana. Mér fannst efnið í henni of gott til að henda og datt í hug að gera leggings á LK. Því miður gleymdi ég að taka mynd af peysunni áður en ég klippti hana en ég setti buxurnar þar sem ermarnar voru til þess að hægt sé að átta sig aðeins betur á því hvernig ég klippti. Ég lagði gamlar leggings buxur á peysuna og klippti eftir þeim. Saumaði svo saman í overlock vélinni og úr urðu þessar fínu ullarleggings og passa svona líka fínt.

Næsta peysa

Þessa er ég næstum því búin með, var að klippa hana í dag og á bara eftir að hekla og setja smellur að hennar ósk. Hún er úr einföldum plötulopa og einbandi saman og búkurinn er prjónaður á prjóna nr. 6 en stroffið á prjóna nr. 5. Litirnir koma vel út finnst mér.

Bloggið vaknað aftur

Já það er nú löngu kominn tími til að vekja bloggið upp af værum svefni. Hér hefur ýmislegt verið framkvæmt, mikið prjónað auðvitað og flutt í nýtt hús. Nú ætla ég að reyna að taka myndir af því sem ég hef verið að gera undanfarið og setja inn. Vonandi tekst það!

Þessar peysur voru prjónaðar í sumar á milli kassa í flutningunum. Ég er bara ánægð með báðar, ég nota mína mikið. Hún er úr einföldum plötulopa og prjónuð á prjóna nr. 4,5. Mynstrið er það sama og ég gerði á peysu á JÁ fyrir nokkru síðan. Peysan hennar GM er úr léttlopa og prjónuð á prjóna nr. 4,5 eða 5 man það ekki.

Þarna er LK í peysunni sinni sem er frá Textílgarn.is. Þetta er æðislegt ullargarn sem er á frábæru verði og prjónast mjög fallega. Þarna nota ég garnið einfalt og prjóna nr. 3,5.

Svo fín og flott stelpa í peysunni sinni.