Lilja Katrín í nýju peysunni

Hér er hún komin í nýju peysuna sína sem ég var að klára, setti tölur í hana í dag. Hún er prjónuð ofan frá og niður og fyrst notaði ég ljósrautt garn sem var afgangur af kjólnum sem ég prjónaði á hana. Svo þegar hann kláraðist þá bætti ég við dökkrauðum lit og finnst mér það bara koma vel út. Hún er svo montin að geta staðið svona sjálf, hún getur það í nokkrar sekúndur og svo dettur hún. En hún stendur meira og meira á hverjum degi. Það er ekki langt í að hún fari að labba held ég. Hún var svo fín í dag, í kjól og þessari peysu með prjónuðu dúkkuna sína og prjónahúfu allt eftir mig.