Prjónninn

Næsta peysa

2011-11-07T22:27:00.001Z

Þessa er ég næstum því búin með, var að klippa hana í dag og á bara eftir að hekla og setja smellur að hennar ósk. Hún er úr einföldum plötulopa og einbandi saman og búkurinn er prjónaður á prjóna nr. 6 en stroffið á prjóna nr. 5. Litirnir koma vel út finnst mér.

Bloggið vaknað aftur

2011-11-07T22:14:00.005Z

Já það er nú löngu kominn tími til að vekja bloggið upp af værum svefni. Hér hefur ýmislegt verið framkvæmt, mikið prjónað auðvitað og flutt í nýtt hús. Nú ætla ég að reyna að taka myndir af því sem ég hef verið að gera undanfarið og setja inn. Vonandi tekst það!

Þessar peysur voru prjónaðar í sumar á milli kassa í flutningunum. Ég er bara ánægð með báðar, ég nota mína mikið. Hún er úr einföldum plötulopa og prjónuð á prjóna nr. 4,5. Mynstrið er það sama og ég gerði á peysu á JÁ fyrir nokkru síðan. Peysan hennar GM er úr léttlopa og prjónuð á prjóna nr. 4,5 eða 5 man það ekki.

Þarna er LK í peysunni sinni sem er frá Textílgarn.is. Þetta er æðislegt ullargarn sem er á frábæru verði og prjónast mjög fallega. Þarna nota ég garnið einfalt og prjóna nr. 3,5.

Svo fín og flott stelpa í peysunni sinni.

Tveir kjólar í einum

2010-08-19T22:00:00.002Z

Þetta efni keypti ég í London í efnabúðinni krúttlegu. Ég sá svo sæta kjóla á markaði í London sem voru heimasaumaðir og nokkurn vegin svona. Ég hugsaði auðvitað að þetta gæti ég nú gert sjálf og ákvað að reyna að teikna sniðið sjálf. Þetta er mjög einfalt eins og sést og ekkert mál að sauma. Kjóllinn er tvöfaldur og hægt að nota hann bæði á réttunni og röngunni.

Rauður .......

og blár!

Kjólar kjólar kjólar

2010-08-19T21:44:00.004Z

Ég er búin að vera með þá hugmynd lengi að breyta skyrtu í kjól á LK. Ég átti tvær skyrtur sem voru of litlar á JÁ og fannst upplagt að nota þær. Efnið í þeim var flott og ég týmdi ekki að henda þeim. Ég er mjög sátt við útkomuna og þeir eru mjög flottir á henni litlu LK minni. Hún er nú reyndar ekki mjög fús að máta neitt nýtt og þurfti mikla þolinmæði af minni hálfu til að koma henni í kjólana.

Ég byrjaði á því að klippa ermarnar og kragann af. Svo setti ég teygju í hálsmálið og ermarnar og líka í mittið og voilá kominn kjóll. Þetta er mjög einfalt og eflaust hægt að gera eitthvað annað snið sem er aðeins flóknara, ég prófa það næst.

Útkoman er ótrúlega flottur og sætur kjóll.

Svo er það hin skyrtan sem ég gerði líka kjól úr á undan þessum græna. Þarna er sama aðferðin notuð og passar hann líka ótrúlega flott á henni.

Þarna er svo krúttið í kjólnum. Ég reyni að taka betri myndir af henni og setja inn. Það er frekar erfitt að ná góðri mynd af henni hún er svo fjörug, alltaf á fullu að leika sér.

Ég á örugglega eftir að gera fleiri útgáfur þegar fleiri skyrtur falla til. JÁ neitar núna að vera í skyrtum þannig að það er kannski ekki von á fleirum.

meira meira

2010-08-12T13:23:00.002Z

Þetta er húfa sem ég byrjaði á þegar ég fór á námskeið í Nálinni í júní með Helgu Isager sem er danskur prjónahönnuður. Það var mjög skemmtilegt námskeið og lærði ég nokkur ný "trikk". Þegar ég segi fólki frá því að ég sé að fara á prjónanámskeið eða hafi verið á námskeiði þá eru yfirleitt fyrstu viðbrögð hlátur. Ég fer nú alveg að verða móðgðuð yfir þessu en fólk spyr hvað ég geti lært meira í prjóni, kanntu ekki allt? Nei ég kann sko ekki allt í prjóni, ég held að eftir því sem maður lærir meira þeim mun meira finnst manni að sé eftir að læra. Ég veit ekki hvort þið skiljið þetta, en mér finnst alltaf gaman að læra eitthvað nýtt og hitta nýtt fólk sem er að gera áhugaverða hluti. Og hana nú.
Húfan er sem sagt búin núna og LK er farin að nota hana, hún passar flott og er mjög sæt á henni.

Þetta er svo garn sem ég keypti í London á útsölu og heitir Mirasol og er frá Perú. www.mirasolperu.com Þetta er 50% merino ull og 50% silki og prjónast á prjóna nr. 4. Þetta er dásamlega mjúkt og fallegt garn. Mér datt í hug að hekla peysu á LK og er rétt byrjuð. Eins og heyrist þá fær bara minnsta prinsessan að njóta prjónaframleiðslunnar. GM er bara látin prjóna sjálf og JÁ vill bara vera í íþróttafötum, þannig að það er ekki mikið annað um að ræða en að prjóna á þá minnstu.

Svo er það æpandi turkispeysan sem ég er að prjóna. Þetta er úr einbandi og er uppskriftin af kjólnum úr einbandsblaðinu sem heitir Miðja. ALE vinkona mín prjónaði svona peysu ljósbrúna og ég varð alveg heilluð. Enda fær hún hrós hvert sem hún fer í peysunni. Ég stytti hana aðeins og lengi ermarnar miðað við uppskriftina. Ég er með prjóna númer 4,5. Það er spennandi að sjá hvernig hún kemur út og líka spennandi að sjá hvort ég þori einhvern tíman að vera í þessum lit!!

Svo bíður mín dásamlegt garn sem ég keypti í London í búð sem heitir www.loopknitting.com Þetta er handlitað garn frá Kananda og er úr 81% merino, 9% cashmere og 10% nylon. Það er 325 metrar í 115 gr. Ég hafði hugsað mér trefil eða sjal handa mér, einhverskonar gatamynstur.... ég er ekki alveg búin að ákveða mig. Enda með margt annað á prjónunum.

Þannig að ég má eignlega ekkert vera að því að fara að vinna, en verð samt að byrja á mánudaginn. Það er svo margt spennandi sem hægt er að gera að mér dugir eiginlega ekki sólarhringurinn í að framkvæma allt sem mig langar.

Nóg í bili.

sumarafrakstur

2010-08-10T09:38:00.003Z

Þá er nú kominn ágúst og ég hef nú ekki setið auðum höndum í hannyrðum frekar en fyrri daginn. Við hjónin fórum til London í lok júní og keypti ég bæði garn og efni þar sem ég er að byrja að sauma og prjóna úr. Ég komst í himneska efnabúð og hefði ég getað keypt miklu meira. Ég hafði alltaf í huga pils eða kjóla handa LK og saumaði svo smá um daginn.

Svo er það endurvinnslan sem er alltaf í gangi hér. Þetta er skyrta af JÁ sem var orðin of lítil á hann svo ég klippti ermarnar og kragann af og setti teygju í. Kjóllinn er reyndar aðeins of víður á hana og ætla ég að setja teygjur í hliðarnar. Ég set inn myndir seinna af því.

Svo er hún GM nú alltaf svo dugleg að prjóna. Hún vildi prjóna sér peysu í sumar og gengur það svona rosalega vel. Hún prjónaði mikið á ferðalagi í sumar. Við mæðgur prjónuðum í bílnum á leiðinni norður. Svo fórum við í ermakeppni, við byrjuðum á sama tíma á ermum en hún fór langt fram úr mér. Þetta er Cool Flamme garn og prjónar nr. 8.

Hér er svo ein enn húfan sem ég prjóna eftir þessu mynstri. Þessa húfu á lítill kínverskur strákur að fá sem var að koma heim með mömmu sinni og pabba frá Kína núna í júlí. Þarna var ég reyndar ekki alveg búin með hana en ég er búin núna. Húfan fékk rauðan dúsk og hlakka ég mikið til að sjá drenginn með húfuna.

Þetta er ekki búið, það kemur annar póstur með restinni......

Helga Isager

2010-06-13T10:06:00.002Z

Þetta er peysa sem ég sá í bók eftir Helgu Isager sem er danskur prjónahönnuður. Mér fannst hún svo flott að ég varð að prjóna hana á LK. En ég týmdi ekki að kaupa bókina sem kostar bara 8400 kr í Nálinni svo ég las bara uppskriftina og mundi lykkjufjöldann. Svo setti ég bara einhverja liti og notaði líka garn sem ég átti. Mér finnst hún koma mjög vel út, hún er mjög flott á LK en ég er búin að vera allt of lengi með hana svo hún passar akkúrat núna. En það eru endalausir endar sem þarf að fela því í röndunum á milli eru notaðir 4 litir í 2 garða.

Ég er að fara á námskeið í Nálinni nú í júní hjá Helgu Isager og er mjög spennt að sjá hvað hún ætlar að kenna okkur.

Svo er ég nú með fullt annað á prjónunum það er aldrei aðgerðaleysi hér á þessum bæ. Það koma myndir inn seinna af því.

Svo mæli ég með því að allir skoði nýja Lopa 30 sem kemur út í september, þið eigið eftir að þekkja einn hönnuðinn þar!!

algjör snilld

2010-06-13T09:53:00.002Z

Ég er á leiðinni til London í lok júní og langar að skoða flottar garnbúðir. Minn elskulegi eiginmaður er búinn að liggja á netinu til að reyna að finna flottar búðir fyrir mig. Hann rakst á þetta í gær sem er algjör snilld. Maður skrifar bara nafnið á borginni sem maður er að fara til og þá kemur kort af öllum garnbúðum þar. Reyndar er Reykjavík bara með Álafoss skráð hjá sér en ég þekki allar búðirnar hér þannig að það kemur ekki að sök.

http://www.knitmap.com/

Ég mæli með þessari síðu.

Tvær töskur, eða fjórar!

2010-01-19T22:13:00.002Z

Ég var heima í dag með LK veika, hún var nokkuð pirruð enda mikið kvefuð og með hita og barkabólgu. En mér tókst samt að sauma tvær töskur, sem eiginlega eru fjórar. Þær eru báðar þannig að hægt er að snúa þeim við og þá er annað mynstur inní.

Garðaprjónspeysa

2010-01-16T22:02:00.002Z

Þessa peysu prjónaði ég nú í desember, hún er eftir uppskrift af DVD disknum hennar Röggu. Mjög auðveld peysa en samt með nokkrum trikkum sem skemmtilegt var að læra

Svo fann ég þessar tölur sem passa fullkomlega við peysuna. Þetta er léttlopi og prjónar nr. 5,5 minnir mig.

Ég er mjög ánægð með hana og LK er mjög fín í henni. Reyndar finnst mér útaukningarnar ekki á réttum stöðum, ég myndi vilja dreifa þeim betur, þær sjást of mikið að mínu mati. En peysan er prjónuð ofan frá og niður, það er mjög skemmtileg aðferð, ég hugsa að ég geri fleiri svoleiðis.

Lopi

2009-10-28T16:44:00.002Z

Já nú er það lopi.

Það er kallað kreppuprjón hér.

Ég verð nú að segja að mér finnst skemmtilegra að prjóna úr einhverju rándýru eðalgarni úr Storkinum eða Nálinni heldur en lopanum sem sífellt slitnar hjá mér núna. En það fæðast samt hlýjar og notalegar peysur bráðum hjá mér. Guðrún María er að klára sína peysu og ég er að prjóna eina úr einföldum plötulopa á hana, þessi sem er alltaf að slitna. Þær verða báðar mjög fallegar og góðar og eru alveg að klárast. Ég reyni að setja inn myndir á eftir.

Fleiri smekkir

2009-10-06T22:45:00.001Z

Ég heklaði þessa um daginn, mér finnst þetta svo gaman að ég gæti alveg hugsað mér að gera fleiri. Þetta er svo fljótlegt og skemmtilegt.

Vettlingar

2009-09-27T17:14:00.003Z

Ég gerði þessa vettlinga eftir að hafa séð vettlingana hjá "Made by Pom" blogginu. Ég notaði tvo þræði af einbandi, ljósbrúnan og dökkbrúnan saman. Heklunál nr. 4 og hálfstuðla. Ég var tvö kvöld með þá og skreytti svo með handlituðu bandi sem ég keypti í Þingborg í sumar.

Ég er bara ánægð með útkomuna.

Legghlífar

2009-09-06T19:43:00.006Z

Ég sá þetta einhversstaðar á netinu, ég er alltaf að rekast á svo flottar prjónasíður (blogg). Þetta er algjör snilld, þegar Lilja Katrín er í sokkabuxum og kjól, sem mig langar oftast að hafa hana í, þá set ég á hana legghlífar þegar við förum út svo henni verði ekki kalt á kálfunum. Og hún rífur þær ekki af sér, sem ég óttaðist fyrst. Þær eru svo sætar.

Hér kemur uppskriftin, svona minnir mig að hún sé, þetta er upp úr mér.

Fitjað upp 10 L á prjón á prjóna nr. 3,5 með Kambgarni, fallega rauðu.

Prjónað ca 5-7 cm, þá aukið út um 2 L, prjónað 8 umferðir, þá aukið út um 2 L, prjónað 8 umferðir, þá aukið út um 2 L. Þá eru prjónaðar 8 umferðir aftur og tvær L teknar saman, svo prjónaðar 5 umferðir, þá teknar tvær saman aftur og svo prjónaðar 5 umferðir og allt fellt af. Tilbúið!!

Einfalt og fljótlegt.

Fleiri smekkir

2009-09-06T18:42:00.002Z

Hér eru fleiri heklaðir smekkir. Mig langaði að prófa önnur form en er á bleika og rauða smekknum. Þetta er líka fínna bómullargarn sem ég keypti í A4 (áður Skólavörubúðin) á Smáratorgi. Þeir eru léttir og liprir og langar mig að gera enn fleiri.

Lilja Katrín í nýju peysunni

2009-08-29T19:18:00.002Z

Hér er hún komin í nýju peysuna sína sem ég var að klára, setti tölur í hana í dag. Hún er prjónuð ofan frá og niður og fyrst notaði ég ljósrautt garn sem var afgangur af kjólnum sem ég prjónaði á hana. Svo þegar hann kláraðist þá bætti ég við dökkrauðum lit og finnst mér það bara koma vel út. Hún er svo montin að geta staðið svona sjálf, hún getur það í nokkrar sekúndur og svo dettur hún. En hún stendur meira og meira á hverjum degi. Það er ekki langt í að hún fari að labba held ég. Hún var svo fín í dag, í kjól og þessari peysu með prjónuðu dúkkuna sína og prjónahúfu allt eftir mig.

Hekl

2009-08-24T22:07:00.002Z

Ég prófaði að hekla smekk handa Lilju Katrínu og finnst hann svona rosalega flottur! Nú langar mig að gera fleiri og keypti bómullargarn í A4 í dag, (áður Skólavörðubúðin). Mig langar að gera líka öðruvísi í laginu en samt ekki þessa týpisku hekluðu smekki, mér finnst þeir ekki flottir. Svo eru auðvitað plastsmellurnar notaðar sem www.krútt.is er með í bleiunum.

pjónað í sumar

2009-08-08T18:29:00.004Z

Þetta er lopapeysa úr léttlopa sem ég gerði á mig í júní. Þetta mynstur er frá Önnu Leif vinkonu minni og hefur vakið athygli. Þetta er ekki svona týpiskt munstur enda finnst mér þau orðin einum of algeng og langar mig ekki í svoleiðis peysu. Mér finnst þessi æðisleg, hún er öðruvísi og létt og góð. Ég splæsti í hreindýrahornatölur sem passa fullkomlega.

Guðrún María er að prjóna sér lopapeysu og gengur það alveg rosalega vel. Hún er svo dugleg og klár stelpan mín, ég er mjög stolt af henni að leggja í þetta verkefni, aðeins 11 ára. Hún er líka úr léttlopa eins og sést á myndinni og á að vera með gráu mynstri, dökkgráar og ljósgráar áttablaðarósir.

Þarna sést eitt af prjónamerkjunum sem við Guðrún María bjuggum til einn daginn í sumar. Þau virka vel og eru mjög flott finnst okkur.

Þetta er byrjun á peysu á Lilju Katrínu. Ég átti þetta rauða og ljósbleika og fór svo í dag og keypti dökkvínrautt til að klára. Ég get bara ekki staðist þetta garn sem heitir "Baby Cashmerino" frá Debbie Bliss. Mér finnst það æði, ég get bara ekki sagt það nógu oft. Ég vildi að ég ætti alla liti heima þó ekki væri nema bara að horfa á það.

Þarna byrjaði ég efst, í hálsmálinu og ætla að prjóna hana niður, það er svo skemmtileg aðferð!

Svo er það dúkkan sem ég prjónaði í vor. Ég sá hana í Storkinum og féll fyrir henni, alveg kylliflöt. Ég notaði afganga og eru það mestmegnis "Baby cashmerino" frá Debbie Bliss. Ég er mjög ánægð með hana og finnst hárið geggjað.

Svo er auðvitað meira á prjónunum. Ég er að gera peysu á mig úr einföldum plötulopa, þar sem ég byrja á hálsmálinu eins og á rauðu peysunni.

Í sumar keypti ég svo þingborgarlopa, hvítan og er enn að hanna í huganum peysuna sem verður auðvitað á mig!!

Leðurskór

2009-06-07T22:36:00.002Z

Já þessa skó saumaði ég á LK úr afgangs leðri sem ég á í poka. Ég á fullan bónuspoka af þessu brúna leðri en engan annan lit, ég væri til í rautt og grænt leður líka, þarf að athuga það. Þetta var ekkert mál að sauma þetta, ég keypti snið frá Ameríku og fór eftir því að mestu leyti. Svo á ég fullt af borðum sem ég keypti í Kanada fyrir 4 árum síðan. Ég er ótrúlega ánægð með útkomuna og þeir passa flott á LK.

Lopapeysa

2009-06-07T22:29:00.003Z

Þarna er JÁ að máta lopapeysuna sem ég er að klára á hann. Hún verður með rennilás að hans ósk. Þarna er ég að athuga hvort hálsmálið sé í lagi og hann mátaði með prjóninn í. Ég er ótrúlega ánægð með mynstrið sem við JÁ sáum í Álafoss búðinni í Mosó. Þar sáum við peysu eins og þessa nema prjónuð úr tvöföldum plötulopa og með tölum. Þessi er úr Léttlopa. Konan í búðinni sagðist ekki eiga munstrið í bók, þannig að hún ljósritaði bara peysuna sem var til í búðinni og ég fór eftir því. Það var alveg nóg fyrir mig, ég mundi litina og gat talið út eftir ljósritinu. Algjör snilld, það er ekkert mál að setja peysu í ljósritunarvél og telja út eftir því. Hann er mjög ánægður með peysuna, nú þarf bara að finna rennilás og klára hana.

Mig langar bara líka í lopapeysu, ég er svo ánægð með þessa. Það er nauðsynlegt að eiga lopapeysu á sumrin á Íslandi finnst mér. Svo vill GM líka fá lopapeysu, þannig að það eru næg prjónaverkefni framundan. Veii, gaman gaman.

Húfur 1, 2 og 3

2009-06-07T22:22:00.002Z

Þetta er húfa sem Jóhanna systir prjónaði handa stelpunni sinni sem er 15 ára. Hún er samin um leið og hún er prjónuð. Mig langaði að gera svona handa LK og fékk hana lánaða til að fá innblástur.
Þetta er svo húfan sem ég gerði úr afgöngum og lykkjufjöldinn og stærðin er alveg eins og á húfunni frá Jóhönnu. Hún varð heldur lítil svo ég ákvað að gera bara aðra. Enda er maður mjög fljótur með hverja húfu og ég var svo spennt að halda áfram að ég lagði hana eiginleg ekki frá mér fyrr en ég var búin.
Þannig að ég gerði aðra húfu. Bætti við 8 lykkjum og dýpkaði hana örlítið. Ég minnkaði eyrun og hafði böndin mjórri. Þetta eru líka afgangar og skáldað mynstur á leiðinni. Þessi kom mjög vel út og hún er farin að nota hana.

Nýtt á prjónunum

2009-05-02T20:39:00.002Z

Þetta er teppi sem ég er að prjóna fyrir bók sem kemur út með haustinu held ég. Þetta er sama prjónið og í ljósa teppinu sem ég gerði fyrir LK en þetta er úr grófara garni. Það heitir Silkbloom og er úr 45% silki og 55% merinoull. Rosalega mjúkt og girnilegt. Það fæst í Nálinni, Laugavegi.

Húfa sem ég gerði úr afganginum af Kauni garninu sem ég gerði sjalið úr.

Húfa og vettlingar á lítið barn sem átti að vera komið fyrir 5 dögum síðan. Við bíðum spennt, þetta er vinur hans J sem er að eignast systkini. Ég segi að það komi stelpa en J er ekki sammála mér. Spennandi.

Kjóll sem ég prjónaði á LK. Hann er of stór ennþá sem er fínt, hann passar u.þ.b. þegar hún fer að labba. Hann er mjög flottur, prjónaður úr baby cashmerino frá Debbie Bliss sem ég eeeelllska. Ég er búin að gera ótrúlega margt úr þessu garni og fell alltaf fyrir því aftur. Bleika peysan sem ég gerði á LK er líka úr þessu garni.

nýtt!!

2009-03-30T15:19:00.000Z

komin með heimasíðu fyrir taubleiuframleiðsluna

www.krútt.is

Nýjustu verkefnin

2009-02-12T21:00:00.002Z

Þetta eru buxur sem ég saumaði á LK, þær eru úr velúr, alveg yndislega mjúkar og fínar. Þær eru svolítið stórar en hún getur samt alveg notað þær. Ég tók sniðið upp úr bók sem heitir "Blödt börnetoj" frá Klematis. Hún er mjög flott.

Svo eru það sokkarnir sem ég er að prjóna á GM, ætlaði að vera löngu búin með þá. Þetta er Hjerte garn sem heitir sock og ég keypti í Álafossbúðinni. Þetta er sama garn og ég notaði í vettlingana sem ég prjónaði fyrir jólin. Ég fitjaði upp á með bleiku Mohair Kitten sem ég átti, bara svo að hún þekki þá fljótlega í skólanum. Þá eru þeir ekki bara alveg gráir. Ég gerði líka svona sokka á JÁ en þeir eru orðnir svo skítugir og notaðir að ég vildi ekki taka mynd af þeim.

Græna peysan

2009-01-13T22:09:00.003Z

Hún er langt komin græna peysan sem ég er að prjóna núna. Þetta er í þriðja skiptið sem ég prjóna úr þessu garni sem er Marianne Isager garn keypt í Skive í Danmörku. Vonandi þarf ég ekki að rekja hana upp eina ferðina enn og prjóna aðra. Þessi lofar góðu og er ég ánægð með það sem komið er. Mig langar að hafa hana aðeins síðari en þetta og svo eru auðvitað ermarnar eftir. Ég vona að ég eigi nóg garn í hana. Allavegana var nóg garn í hina peysuna þannig að það hlýtur að duga.

Þarna er peysan sem ég prjónaði nr. 2 úr þessu garni. Ég átti því miður ekki betri mynd af henni en þessa gleðimynd sem er tekin í vorferð með skólanum fyrir nokkrum árum. Alltaf gaman hjá kennurum.

Kauni

2008-12-27T23:21:00.002Z

Hyrnan dásamlega er að fæðast úr Kauni garninu sem ég keypti hjá Helgu í Nálinni. Prjónarnir eru ekki síður fallegir, en þá fékk ég í himneskri garnbúð í Stokkhólmi í september 2007. Ólöf vinkona leiddi mig í þessa búð, þó hún prjóni lítið sjálf þá veit hún hvar bestu búðirnar eru. Ég hefði getað eytt helginni í þessari búð en vildi ekki láta hana bíða endalaust eftir mér. Það er hrein unun að prjóna með þessum prjónum. Ég held að það verði allt fallegt sem kemur af þeim.

Garnið er svo spennandi að ég get varla lagt þetta frá mér. Ég ætla að kaupa aðra dokku í rauðu þegar hún kemur í Nálina eftir áramótin.

Jólakúlur

2008-12-27T13:01:00.002Z

Þetta eru hekluðu jólakúlurnar sem ég gerði í fyrra. Önnur var skreytt með perlum en hin ekki. Ég notaði eitthvað loðið garn sem ég átti, mig minnir að þetta hafi verið Kitten Mohair úr Hagkaup.

Heklað jólaskraut

2008-12-27T12:51:00.002Z

Já það er hægt að hekla jólaskraut. Þetta gerði ég í fyrra fyrir jólin ásamt nokkrum hekluðum jólakúlum. Þemað í ár var hvítt og rautt og þarf ég að leggjast í að gera fleiri. Þetta er nú bara gert úr afgöngum, það fer mjög lítið í þetta. Mig minnir að ég hafi byrjað neðst og heklað keilu.

Verðlaunahafinn Guðrún María

2008-12-02T15:48:00.002Z

Þessi mynd var tekin þegar Guðrún María fékk íslenskuverðlaun Menntaráðs Reykjavíkurborgar á degi íslenskrar tungu þann 16. nóvember sl.

Skírn Lilju Katrínar 23. nóvember 2008

2008-11-28T11:58:00.001Z

Fimmmannafjölskyldan eftir skírnarveisluna

Systkinamynd, ég, Guðmundur og Jóhanna.

Flottust!!

Hjónin með nýskírða dóttur.

Lilja Katrín 6 vikna

2008-11-24T21:45:00.001Z

Lilja Katrín Gunnarsdóttir

2008-11-24T12:46:00.002Z

Já hún er búin að fá nafn elsku litla stelpan okkar. Hún var skírð í Dómkirkjunni í gær, 23. nóvember. Lilja Katrín Gunnarsdóttir. Guðrún María hélt á henni og Jóhann Árni sagði nafnið.

Ég set inn myndir fljótlega.

Væl

2008-11-19T11:32:00.002Z

Já hér er grenjað öll kvöld og foreldrarnir orðnir svolítið þreyttir, gamla settið!. Ég er á því að daman sé orðin frekjudós aðeins 6 vikna gömul, en lausn er ekki í sjónmáli eins og er. Því er lítið um prjónaskap þessa dagana eða eitthvað annað skapandi. Ég er reyndar með eina vettlinga á prjónunum og gríp í þá þegar ég get, en ég held að ég hafi sjaldan verið svona lengi með eitt par af vettlingum áður. Ég skal reyna að setja inn mynd við tækifæri.

Ef einhver lumar á góðu ráði um hvernig hægt er að láta 6 vikna gamalt barn sofna á skikkanlegum tíma (ekki 1,2, eða 3 um nóttina eins og hún gerir) og í sínu eigin rúmi án þess að foreldrarnir þurfi að ganga um gólf í 3 tíma á hverju kvöldi, þá eru öll ráð vel þegin.

Annars á að skíra hana á sunnudaginn, og kannski er það bara það sem vantar: nafn. Hún vill fá nafn sem fyrst!!

Guðrún María

2008-11-05T22:26:00.003Z

Já hún Guðrún María er sko alveg frábær. Hún kom heim í dag með bréf frá skólanum þar sem segir að hún var tilnefnd til íslenskuverðlauna Menntasviðs Reykjavíkurborgar 2008. Hún fékk þessi verðlaun, ein í sínum skóla og erum við boðin í Ráðhús Reykjavíkur til að taka á móti verðlaununum á degi íslenskrar tungu 16. nóv. Við erum að sjálfsögðu mjög stoltir foreldrar núna eins og alltaf.

alltaf sofandi

2008-10-28T18:28:00.002Z

Já hún sefur mjög mikið eins og börn þurfa á þessum aldri. Dagurinn gengur út á að drekka, sofa og kúka. Þægilegt líf!

Þá er hún komin

2008-10-12T12:06:00.002Z

Já loksins er hún komin, litla daman. Hún fæddist þann 9. október kl 6:33 um morguninn eftir ca 5 klukkutíma puð. Hún var 4485 gr. (sem er um 18 merkur) og 55 cm löng. Hún er með mikið svart hár og feitar bollukinnar. Eins og sést af myndunum eru systkini hennar afar stolt af henni. Mikið urðum við fegin að sjá hana eftir alla þessa bið og sjá líka að hún var svona fullkomin. Hún fékk 10 í læknisskoðuninni á spítalanum og er dugleg að drekka. Allt gengur vel og er ég öll að hressast eftir átökin.

Vettlingar á mig

2008-10-07T13:40:00.001Z

Endurnýting í gangi þessa dagana. Fann plötulopa í kassa hjá mér og loðið grænt garn og úr því urðu þessir fínu vettlingar á mig fyrir veturinn.

vika 42

2008-10-07T10:37:00.003Z

Kæra Barn

Nú er nóg komið. Hversu lengi á ég að bíða eftir þér. Systkini þín koma heim með vonleysissvip á hverjum degi úr skólanum þegar þau sjá kúluna á mér. Þau segja líka "gangi þér vel ef þú ferð á spítalann í dag" á hverjum morgni þegar þau fara út úr dyrunum. Hver dagur fyrir þeim er miklu lengri að líða en fyrir mig og er ég nú samt eignlega búin að fá nóg af biðinni.

Ég er búin að prjóna allt sem mér dettur í hug. Ég er búin að lesa nokkrar bækur, (sem ég geri aldrei, er að minnsta kosti ca 1/2 ár með eina bók venjulega). Er búin að þvo allan þvott sem er í óhreinatauinu, ( sem gerist mjög sjaldan að það sé tómt). Nýbúin að ryksuga og þurrka af, (kannski ég geri það aftur á eftir!!).

Já við bíðum öll spennt eftir að sjá þig. Pabbi þinn vinnur heima alla daga núna.

Farðu nú að koma, ég bíð eftir verkjum!

Nýjasta peysan

2008-10-02T21:17:00.003Z

Þessa peysu prjónaði ég úr afgöngum. Ég byrjaði á henni í gær og kláraði hana áðan. Ég á reyndar eftir að setja tölur á hana. Svo er bara að sjá hvort hún passar, hún varð heldur lítil og með þessu áframhaldi þá verður hún bara á Baby Born. Ég er orðin pínu þreytt á að bíða, þó ég hafi nú bara beðið í 2 daga. Fór oft upp og niður stigann í dag, fór út í gönguferð, fékk punktanudd hjá Jóhönnu systur....... vitið þið um fleiri ráð??

Til sýnis

2008-09-26T17:15:00.002Z

Í glugganum á Nálinni á Laugaveginum er nú til sýnis silkihúfan, vettlingarnir, trefillinn og sokkarnir sem ég prjónaði ef einhver hefur áhuga á að skoða. Mér láðist að taka myndir af þessu áður en þetta fór til Helgu. En það er alltaf gaman að gera sér ferð á Laugaveginn og kíkja þá á gluggann í leiðinni.

Er heima að bíða, 4 dagar eftir!!

í fríi heima

2008-09-17T13:38:00.003Z

Já nú er ég komin í frí og bíð eftir að daman komi. Ég hef það bara mjög notalegt, er núna að hlusta á tónlist og prjóna litla barnasokka úr silkigarni. Ég sef á morgnanna eftir að krakkarnir eru farnir í skólann. Ég er líka að lesa bók sem er mjög spennandi og heitir Steinsmiðurinn eftir Camillu Läckberg. Krakkarnir koma svo um tvö leytið heim þannig að dagurinn er ekki lengi að líða hjá mér.

Annars bíð ég spennt eftir að heyra niðurstöðurnar úr kosningunni hjá ljósmæðrum á föstudaginn. Ég vona svo innilega að þær fari nú ekki að samþykkja eitthvað mikið minna en þær börðust fyrir bara til að koma í veg fyrir neyðarástand. Þetta segi ég sem er sett daginn eftir að alsherjarverkfallið átti að skella á. Þær mega bara ekki gefast upp í baráttunni fyrir jöfnum launum kynjanna. Ég lít svo á að þær séu að berjast fyrir mig líka sem tilheyri kvennastétt. Og hana nú, áfram ljósmæður.

myndir

2008-09-12T16:53:00.002Z

Hér er bleika peysan tilbúin, búið að festa tölurnar og borðann á sinn stað.

Þetta er Hello Kitty myndin sem GM og ég saumuðum á bol sem hún á. Mér fannst hún heldur lengi að klára hana svo ég tók hana og gerði hjartað. En við erum mjög sáttar við útkomuna.

Þetta er gallinn sem ég saumaði úr bókinni sem ég keypti í Danmörku. Hann er í stærð 68 og mjög hlýr held ég, kannski of hlýr!

Vendingin

2008-09-10T16:30:00.002Z

Já ég átti að fara í vendingu í dag en þá kom í ljós að litla snúllan var búin að snúa sér sjálf með hausinn niður. Hún er greinilega að undirbúa sig að koma í heiminn. Hún er samt ekki enn búin að skorða sig þannig að ég þarf að hafa allan varann á ef vatnið fer. Ég sit bara heima í dag og prjóna og hef það huggulegt. Er að þvo síðustu vélarnar af barnafötum og allt er nú að verða tilbúið. Ég er langt komin með að pakka í töskuna sem ég þarf að grípa með mér á spítalann, þannig að ég er tilbúin, það er bara spurning hvort hún sé ekki bara að verða tilbúin líka. Hún var orðin 3600 gr í síðustu viku, stefnir í 18 merkur eins og Jóhann!!

Nú er ég í svona "klára-gír", finnst ég þurfa að klára allt og það gengur bara vel. Ég er alveg að verða búin með silkitrefilinn sem er við húfuna og vettlingana sem eru í Nálinni núna. Svo er ég að klára fyrir GM það sem hún nennir ekki að klára. Svo þarf ég að klára húfuna fyrir Dísu mína sem á bráðum afmæli. Mig vantar meira bútasaumsefni til að geta klárað teppið sem ég dró fram um daginn, langar að klára það. Svo langar mig bara að klára að vera ólétt, mig langar verulega að fara að hreyfa mig eitthvað af viti.

Verkefnin að klárast

2008-08-15T10:01:00.007Z

Já ég kláraði teppið í fyrradag. Það er orðið stórt og fínt, húfan á J er líka búin, bara dúskurinn eftir. Silkihúfan er langt komin, klára hana líklega á næstu dögum. Ég set inn myndir þegar allt er tilbúið. Núna langar mig að fara að sauma, er með teppi sem ég þarf að klára og svo langar mig að sauma flísgalla úr bók sem ég keypti í Danmörku og heitir Blödt Börnetöj og er mjög girnileg. En fyrst þarf maður víst að klára það sem maður hefur, ekki satt?
Svo er búið að boða til prjónakaffis í Nálinni næsta laugardag (menningarnótt) og hlakka ég mikið til.

Prjónaverkefni í gangi

2008-06-30T21:49:00.005Z

Þetta er verkefni nr.1 sem ég er með í gangi núna. Ég er búin að prjóna alla peysuna og sauma saman en á eftir að setja þennan fína borða á hálsmálið og meðfram hnappagötunum og svo á ég eftir að festa tölurnar flottu sem ég keypti í Nálinni.

Þetta er verkefni nr. 2 sem er á prjónunum núna og verður líklegast eitthvað áfram. Þetta er barnateppi sem er frekar seinlegt að prjóna og fíngert. En það er allt í lagi því að það er alltaf gott að hafa eitthvað á prjónunum.

Þetta er svo verkefni nr. 3 og er húfa á Jóhann. Ég byrjaði á henni í dag og hún verður nú ekki lengi á prjónunum hjá mér. Hún er mjög fljótleg og gaman að prjóna hana.

Svo að lokum er það silkihúfan sem ég er að prjóna fyrir mig og Helgu í Nálinni. Ég byrjaði á henni í gærkvöldi og líst bara vel á hana. Þetta er reyndar frekar seinlegt verkefni því ég nota prjóna nr. 2 en skemmtilegt engu að síður.

Eins og sést þá hef ég nóg að gera í sumarfríinu mínu og er mjög fegin og glöð að vera komin í frí.

Prjónað úti í Hallargarðinum

2008-06-17T21:15:00.003Z

Tók þessar myndir í Hallargarðinum á laugardaginn 14. júní í sól og blíðu. Það var frábært að sjá hve margir sátu úti og prjónuðu saman. Góð stemning og frábær dagur.

Njóli,lúpína og fl.

2008-06-07T21:49:00.003Z

Rósir

2008-06-07T21:47:00.002Z

Tók þessa mynd í rósarræktun í Mosfellsdal í gær þegar ég fór í vorferð með vinnunni. Það var mjög gaman, frábært veður og skemmtilegur ratleikur við Reynisvatn.

Krakkarnir í sumar

2008-05-26T20:57:00.002Z

Jæja þá er það orðið ljóst, Guðrún María fer í sumarbúðir með vinkonum sínum í júní og hlakkar mikið til. Svo fer hún líka á ljósmyndanámskeið og ætlar að taka fullt af flottum myndum fyrir mömmu sína þegar hún er búin þar.
Jóhann verður í fótbolta og í fótbolta og í fótbolta í sumar, þrisvar í viku í allt sumar og kannski er hann líka að fara á námskeið hjá TBR með Óttari vini sínum. Sjáum til.
Þannig að ég sé fram á nokkrar Laugavegsferðir ein eða með vinkonum mínum í byrjun júní, barnlaus og alles.

25 stiga hiti

2008-05-08T23:07:00.002Z

Jæja þá er ég búin að pakka hlírabolunum og pilsunum, allt tilbúið fyrir Þýskalandsferðina. Það er víst um 25 stiga hiti þar núna og verður þessa daga sem við verðum úti. Kann samt aldrei að pakka almennilega, er ég með nóg, er ég með of mikið?? Mér finnst taskan hálf tóm og er það fínt því að ég ætla aðeins að kíkja í búðir. Vonandi er allt á sínum stað, HM og fleira.

Jæja best að fara að sofa, kem heim á miðvikudaginn.

Tschüss

Leðurstígvél

2008-04-27T08:56:00.002Z

Já þetta eru leðurstígvélin úr Trippen sem ég keypti óvart á miðvikudaginn. Við Jóhanna fórum með Önnu Leif vinkonu minni í Trippen því HÚN ætlaði að skoða skó. Hún mátaði þessi stígvél sem voru á 50% afslætti. Hún notar nr 41 og voru þau á afslætti því að það voru svo fá pör eftir. Ég spurði bara rétt sí svona, þú átt auðvitað ekki í 39 ef þetta eru restar er það nokkuð? Jú ég á eitt par í 39 sagði búðarkonan góða og viti menn þá var ekki aftur snúið. Við gengum út með tvenn leðurstígvél vinkonurnar í þvi yfirskyni að við værum að kaupa fyrir afmælispeningana okkar (erum reyndar báðar búnar að eiga afmæli í apríl, 19. og 21.)

Ekkert smá ánægð með kaupin!!

Sól sól skín á mig

2008-04-27T08:49:00.002Z

Já nú er loksins komin sólin. Við mæðgur sátum úti á svölum í gær og prjónuðum, GM var komin á hlírabolinn, það var virkilega heitt og gott. Strákarnir voru í handbolta á fótboltavellinum á meðan í gær. Sumarstemming í loftinu. Svo fórum við í sund í sól og blíðu, busluðum þar í klukkutíma þar til laugin var lokuð vegna árshátíðar starfsfólks ÍTR.

Í dag er svo stóri dagurinn, fermingin hennar Þórunnar. Allt gengur að óskum og er það auðvitað Jóhanna sem hefur staðið í öllu og skipulagt allt. Ég baka síðustu tvær kökurnar núna á eftir og fattaði þegar ég var lögst upp í rúm í gær að ég gleymdi að kaupa jarðaberin, því verður reddað í dag.

Saga af tönn

2008-04-12T08:58:00.002Z

Já hann JÁ er búinn að vera með fyrstu lausu tönnina í u.þ.b. 2 mánuði og fullorðinstönnin löngu komin fyrir innan barnatönnina. Móðirin ég hafði auðvitað miklar áhyggjur af þessu og hélt að fullorðinstönnin kæmist ekki á réttan stað fyrir barnatönninni sem vildi ekki fara. Ég fór auðvitað til tannlæknis með drenginn og lét hann líta upp í hann og hann róaði mömmuna eins og góðum tannlæknum ber að gera og sagði mér að hafa ekki áhyggjur af þessu. Fullorðinstönnin færi á sinn stað með tímanum. Það hafði auðvitað enginn nema ég áhyggjur af þessu á heimilinu!! Allir í bekknum hans eru hálf tannlausir eins og 1. bekkingum er vant að vera. En minn maður orðinn 7 ára og þetta orðið svolítið mál fyrir hann að vera ekki búinn að missa neina tönn. Hann er nú frekar fljótur til á margan hátt miðað við aldur eins og t.d. í lestri er hann með 5,8 sem þykir mjög mjög gott á hans aldri. Les eins og þriðjubekkingur. En sem sagt tannþroskinn er ekki í samræmi við annað hjá honum greinilega.

Nema hvað, í gærkvöldi vorum við að borða popp og hann var í tölvunni og við mæðgur að horfa á sjónvarpið. Í eitt skipti þegar hann kemur og nær sér í hnefafylli af poppi í skálina til okkar, þá sé ég að tönnin er farin!!! Ég spyr auðvitað strax "hvað er tönnin farin Jóhann?" Hann hafði ekkert fattað og fór að þreifa með tungunni og verður mjög undarlegur á svipinn. "Hvar er hún" ?? var það fyrsta sem mér datt í hug að segja og hann fékk bara tár í augun og fór að leita á gólfinu hjá tölvunni og á tölvunni og út um allt. Nú braust út mikill grátur þegar við komumst að því að mjög líklega hefði hann borðað tönnina með poppinu. Hann var svo leiður að hann grét yfir þessu í u.þ.b. klukkutíma og barði frá sér og neitaði að knúsa mig og varð alveg óður. Þetta endaði með því að pabbi hans skrifaði bréf til tannálfsins og útskýrði hvað hafði gerst.

Í morgun kom svo til mín stoltur drengur kl 7 með tvo hundrað kalla og vakti mömmu sína með knúsi.

Afmæli

2008-04-05T18:23:00.002Z

Já þetta er afmælishelgin mikla. Ég held að við í fjöskyldunni höfum náð 5 afmælum um þessa helgi og þá tel ég ekki með afmælið sem er á þriðjudaginn.
Sko, ég var boðin í fimmtugsafmæli á föstudagskvöld hjá vinnufélaga mínum, það var mjög gaman. GM var boðin í afmæli hjá bekkjarsystur sinni á laugardagsmorgun 11-13, JÁ var með fjölskylduafmæli kl 12:30 á laugardag og var svo sjálfur boðinn í afmæli til bekkjarfélaga kl 14-16. Á sunnudag er svo bekkjarafmæli fyrir JÁ kl 14-16. Svo er hann boðinn á þriðjudaginn hjá bekkjarfélaga kl 17-19.
Ég ætla EKKI að halda upp á afmælið mitt með veislu eftir 2 vikur, bara svo að það sé á hreinu! Var að hugsa um eitthvað sniðugt með Önnu Leif og jafnvel fleiri Tæfum og svo út að borða með minni elskulegu fjölskyldu um kvöldið. Þar með er það afgreitt. Gunnar var að spá í að halda strákapartý tveimur vikum seinna þegar hann á afmæli svo að þetta er líklega búið í bili.

Er ekki mikil afmælismanneskja!!

Frost

2008-03-22T11:21:00.000Z

prjóna hvað ha!!

2008-03-22T10:18:00.002Z

Já þetta blogg stendur nú eiginlega ekki undir nafni lengur, það er spurning um að skipta um nafn á því. Ég er nefnilega í þvílíkri prjónalægð núna, ég reyndar efast um að sú lægð eigi eftir að fara því að ég hef bara engann áhuga á að prjóna um þessar mundir. Ég meira að segja tók til í prjónahillunum mínum og setti allt garn ofan í kassa svo að ég þurfi ekki að horfa á það. Hvað er að gerast??? spyr ég og örugglega fleiri, en svona er þetta núna. Mig langar mest til að fara að rækta grænmeti og gera eitthvað allt annað.

Fór út að labba áðan með Pál Óskar í eyrunum, það var gott.

Páskafrí loksins

2008-03-14T14:50:00.002Z

Já ég er komin í páskafrí, núna. Frábært og sólin skín, ég er að hugsa um að prófa að setjast út á svalir á eftir. Þetta er aldeilis dásamlegt. Þetta er held ég besta fríið, sólin farin að skína og súkkulaðiát framundan, hvað er hægt að biðja um meira? Svo var verið að bjóða okkur í humarveislu á föstudaginn langa ummm ég elska humar. Nú þarf ég að vera dugleg að taka myndir í fríinu og setja inn.

Hugurinn farinn að flögra fram að sumri, vonandi fáum við gott sumar. Ég man eftir morgunverði á svölunum, hádegisverði á svölunum og setið fram á kvöld á svölunum. Ég held að ég hafi bara búið á svölunum í fyrrasumar.

Verst hvað sést mikið ryk þegar sólin skín.

heima heima

2008-03-03T09:15:00.002Z

já ég er heima í dag með Jóhann veikan, nú sefur hann bara svo að það er auðvitað ekkert annað að gera fyrir mig en að hanga í tölvunni. Hann er með hita og hausverk greyið, það er nú reyndar mjög langt síðan hann var veikur síðast svo maður lætur sig hafa það.
Svo er það saumó í kvöld hjá kennó stelpunum það er orðið svo langt síðan við hittumst að það er sko löngu kominn tími á að hittast. Hlakka til.

íslenskt veður

2008-02-16T18:06:00.002Z

já þetta er dæmigert fyrir Ísland, ef það er ekkert rok þá hlýtur eitthvað að vera að!!

vetrarfrí

2008-02-13T16:29:00.002Z

Já ég er komin í vetrarfrí sem er í heila tvo daga. Og ég er sú eina á heimilinu sem er í vetrarfríi, ummmm....... ég hlakka til á morgun ætla ég að koma krökkunum í skólann og koma mér á fætur og svo hef ég allan daginn fyrir mig. Er mikið að spá í bæjarferð, annars ætla ég bara að spila það eftir hendinni, kannski langar mig bara að fara aftur uppí og þá geri ég það bara. Ljúft líf framundan, í tvo daga.

Jóhann brandarakarl

2008-02-07T22:17:00.000Z

Jóhann sagði brandara í morgun þegar hann var á leiðinni í skólann:

Einu sinni var tómatur að ganga á götu og hann söng " nú liggur vel á mér, nú liggur vel á mér......" svo kom bíll og keyrði á hann og vélin í bílnum kastaðist út. Þá söng tómaturinn "nú liggur vél á mér, nú liggur vél á mér......"

mér fannst þetta alveg ótrúlega fyndið og hann fór með bros á vör í skólann og við mæðgurnar hlógum heima. GM ældi í nótt u.þ.b. 5 sinnum frá 3 leytinu og til morguns. Við ákváðum að vera heima. Svo er hún búin að vera hress í dag og fer vonandi í skólann á morgun. Hún situr nú ekki aðgerðarlaus þó að hún sé heima að jafna sig. Byrjaði á húfu á ömmu sína í morgun og kláraði hana núna eftir kvöldmat. Reyndar virðist hún vera of lítil, svo að við ætlum líklega að kaupa í aðra og hún fer nú létt með það að töfra fram aðra húfu. Amma verður glöð.

Debbie Bliss

2008-02-01T15:14:00.001Z

Garnið góða sem bíður þess að verða sokkar á mig.

Jóhann pönkari

2008-01-31T22:03:00.000Z

Ég varð að setja þessa fínu mynd af Jóhanni sem ég tók áðan þegar hann var í baði. Grallaralegur eins og venjulega.

sokkar fyrir Jóhönnu

2008-01-31T21:32:00.000Z

Loksins er röðin komin að Jóhönnu að fá sokka. Það gengur hratt og vel fyrir sig að prjóna þá því að ég er nú komin í nokkra æfingu. Annars er ég búin að skrá mig á námskeið í Nálinni í að prjóna tvo sokka í einu á einn hringprjón....... já ég skil ekki alveg hvernig það er hægt en er samt farin að reyna að ímynda mér það, spennandi að vita hvort ég hef rétt fyrir mér. Já ég hlakka mikið til. Jóhanna og Elín ætla með mér. Ég á garn í aðra sokka handa mér auðvitað ljósbláa hvað annað og ætla að prjóna þá með þessari nýju aðferð. Ég verð því að bíða til 9. febrúar og horfa á garnið þangað til.

Erika Knight peysa

2008-01-20T11:10:00.000Z

Þetta er peysa sem Þura mágkona byrjaði á þegar hún var ólétt af Emmu Kristínu. Ég tók við henni nú fyrir stuttu og var í gær að klára að prjóna hana svo nú er bara eftir að sauma saman og þvo og teygja til. Eins og sést á myndinni þá er lína í peysunni þar sem ég tók við prjónaskapnum en ég hef trú á því að það lagist þegar ég bleyti hana og toga og teygi.

Betri mynd

2007-12-28T16:48:00.000Z

Hérna er hann samt eins og hann er venjulega. Bara nokkuð góð mynd finnst mér.

Montinn með jólagjöfina

2007-12-28T16:45:00.000Z

já hann var mjög glaður að fá heimsmetabók Guinness í jólagjöf drengurinn og er að venju að gretta sig í myndavélina hjá pabba sínum. Samt fyndin mynd.

Góð mynd

2007-12-28T16:41:00.000Z

Já þessi var tekin þegar GM hélt upp á afmælið sitt ásamt Hildi í Gerplu salnum í Kópavogi. Það var brjálað stuð, líka fyrir okkur foreldrana, við fórum á trampolínið og skemmtum okkur mjög vel.

Hekl hekl

2007-12-28T16:36:00.000Z

heklið hennar GM stækkar og stækkar. Þetta eiga að verða grifflur.

GM að hekla

2007-12-28T15:24:00.000Z

Já hún er ekkert smá dugleg stelpan mín að hekla. Ég sýndi henni í fyrradag hvernig á að hekla í hring og hún náði því bara strax. Allt rétt hjá henni og jafnt og vel gert. Flott hjá þér stelpa!!

verkefni jóladagsins

2007-12-28T14:29:00.000Z

já á jóladag var þessi húfa hekluð, áður en ég varð veik, fékk hálsbólgu, hita, hausverk og beinverki. En blómið var prjónað í gær og sett á húfuna. Er hún ekki fín stelpan mín??

jólafrí

2007-12-21T12:19:00.000Z

jæja þá er greinilega jólafríið byrjað hjá börnunum mínum. Jóhann syngur stanstlaust "þá nýfæddur jesu í ...." og Guðrún María er þokkalega pirruð á honum og kallar stanslaust HÆTTU eða "mamma viltu segja honum að hætta, ég þoli þetta ekki". Nú eru þau að rífast yfir því hver á Mika diskinn. Skemmtilegt jólafrí og byrjar vel.

sumarið 2008

2007-12-03T23:13:00.000Z

Já þá erum við búin að kaupa miðana til Danmerkur næsta sumar. Förum út 11. júlí og komum heim 1. ágúst. Við getum strax farið að telja niður dagana, krakkarnir verða nú glaðir á morgun þegar við segjum þeim að við séum búin að kaupa miðana. Það er alltaf svo dejligt í Danmark og auðvitað í Svíþjóð líka. Sumir dagar eru þegar planaðir en ekki allir ennþá.....

Anna Leif

2007-11-18T19:49:00.000Z

Flottur trefill, flott blóm og flott kona!

Frostið á Flúðum

2007-11-18T19:25:00.001Z

Já svo var auðvitað verið að prófa myndavélina úti í frostinu. Þessi var tekin úti í móa, þar sem ótrúlega fallegar frostrósir mynduðust í moldinni.

Hildur Tinna

2007-11-18T19:21:00.000Z

Já þetta er hún Hildur Tinna í peysunni fínu sem ég prjónaði á hana í sumar og gaf henni. Hún er alltaf brosandi þetta barn, ekki bara þegar hún er í svona fínni peysu, heldur ALLTAF. Hún er algjört æði og erum við Tæfurnar mikið búnar að biðja Ólöfu um að klóna hana en hún tekur nú ekkert allt of vel í það.

Það tókst!!

2007-11-18T19:11:00.001Z

Hér sjást sokkarnir góðu, það tókst hjá mér að prjóna fjögur pör á 6 dögum. Reyndar á ég eftir hálfan hæl á öðrum rauða sokknum en það er bara vegna þess að garnið kláraðist. Það var greinilega minna í rauðu dokkunum en hinum. En Tæfurnar voru alveg rosalega ánægðar með sokkana og pössuðu þeir allir nema á Önnu Leif, ég þarf aðeins að stækka þá. Reyndar lituðu bláu sokkarnir puttana á mér bláa og finnst mér það lélegt að svona dýrt og vandað garn skuli lita. En sem sagt þetta tókst og er það ákveðinn sigur fyrir mig að sanna það fyrir sjálfri mér að ég hafi getað þetta. Gott hjá þér Guðný!!

Myndir af krökkunum

2007-11-04T18:25:00.000Z

Var að æfa mig að mynda þau úti í snjónum um daginn, stillti vélina samkvæmt leiðbeiningum frá ljósmyndanámskeiðinu. Þessar eru fínar en ég þarf samt að æfa mig betur.

Brimar Jónatan

2007-11-04T18:15:00.001Z

Þetta er hann Brimar Jónatan sem hún Bergrós vinkona mín á. Hér er hann í peysunni sem ég prjónaði handa honum, er hann ekki fínn??

Lítil barnahúfa

2007-10-19T16:10:00.001Z

Ég veit ekki hvort að þetta verður einhvern tíman sú barnahúfa sem ég vonast til. Mér finnst þessi uppskrift eitthvað svo skrýtin, hún er ekki alveg eins og Jóhanna systir hefur prjónað. Málið er bara með mig að ég hef aldrei prjónað svona áður, eins og ég hef nú prjónað mikið. En við bíðum bara og sjáum til hvort hún verður að einhverju handa litlu krúsí frænku minni.

sokkarnir guðdómlegu

2007-10-19T16:05:00.000Z

Já svona líta þeir út sokkarnir góðu, ég veit ekkert betra en að smeygja mér í náttbuxurnar eftir að börnin eru farin upp í rúm og ég er t.d. að fara að horfa á eitthvað af uppáhaldsþáttunum mínum í sjónvarpinu, t.d. Gilmore Girls á þriðjud, eða House á fimmtud. eða núna Forbrydelsen á sunnudögum og þá eru hlýir og mjúkir sokkar ómissandi. ( jú og smá súkkulaði líka!)

Alltaf í tölvunni

2007-10-12T20:16:00.000Z

´Já við systur erum alltaf í tölvunni, það er svo gaman, við erum að skoða facebook og fleira. Svo er ég að prjóna svona líka guðdómlega sokka sem ég fer bráðum að setja inn mynd af.

myndir

2007-10-01T17:18:00.000Z

Jæja hér kemur svo útkoman, hún breyttist örlítið á leiðinni en ég er nokkuð sátt við niðurstöðuna.

Röndótta peysan að klárast

2007-09-18T21:40:00.000Z

Já nú hefur ýmislegt klárast. Röndótta peysan er alveg að klárast, teppið sem litla krúttið hennar Þuru fékk kláraði ég nú bara fyrir nokkrum dögum síðan og það heppnaðist mjög vel. Ég gleymdi að taka mynd af því, en geri það við tækifæri. Svo þarf ég bara að fara að finna mér eitthvað nýtt. Ég er að stofna klúbb í vinnunni hjá mér, einhvers konar sauma og prjónaklúbb þannig að ég þarf víst að hafa eitthvað á prjónunum.

Annars er ég mjög spennt fyrir prjónakaffihúsinu sem á að vera í Norræna húsinu í tengslum við Norræna heimilisiðnaðarþingið. Ég ætla sko að kíkja þangað, vona að það sé önnur stemmning þar en í Iðu.

Nokkrar myndir

2007-08-25T13:54:00.000Z

Hér koma nokkrar myndir af því sem ég hef gert í gegnum tíðina. Sumt gamalt og annað er nýrra. Sitt lítið af hvoru, bútasaumur, hekl og fl.

Prjónalægð

2007-08-19T10:56:00.001Z

Tilraunin heppnaðist ekki sem skyldi, körfurnar urðu ekki eins harðar og ég hélt að þær yrðu, þessi hvíta varð samt betri, ég set mynd af henni inn við tækifæri.

Hægt og sígandi prjónast röndótta peysan áfram. Er þó búin að rekja allmikið upp og byrja upp á nýtt eins og ég geri mjög oft. Held þó enn í vonina að hún verði peysa.

Svo er það teppið góða sem ég er ekki enn búin að setja inn mynd af. Það er líka á góðri leið.

Annars voru útsaumspokarnir mínir eftir teikningum frá börnunum til sýnis í Nálinni á Menningarnótt, ég er mjög stolt af þeim.

Tilraun

2007-08-08T13:31:00.000Z

Já það er alltaf gaman að gera tilraunir. Ég fékk þetta í hausinn og þurfti bara að prófa. Þetta er sem sagt prjónuð lufsa sem ég set yfir skál annars vegar og krukku hins vegar og maka það svo með veggfóðurslími. Nú er bara að bíða og sjá hvort að þetta verður eins og myndin sem ég er með í kollinum.

Guðrún María í pilsinu fína

2007-07-23T12:48:00.001Z

Hér er hún fína stelpan mín í nýja pilsinu sínu.

Nýja gamla peysan

2007-07-23T12:33:00.000Z

Hér er ég í nýju gömlu peysunni sem hefur nú nýtt notagildi fyrir mig. Þessi peysa er úr Rowan garni og sumarblaðinu síðan í fyrra. Ég er búin að nota hana mikið með nælu sem ég smíðaði sjálf úr skel og beini. En nú fékk ég nóg af því og vildi breyta henni og setti rennilás í hana.

Nýjasta peysan

2007-07-23T12:30:00.000Z

Þetta er peysan sem ég er byrjuð á, röndótt og fín. Hún er skálduð upp úr mér og það verður spennandi að sjá hvort hún verður að lokum eins og ég hafði ímyndað mér að ég vildi hafa hana.

Garn, garn, garn

2007-07-23T12:03:00.000Z

Guðrún María er svona líka ánægð með pilsið og er oft í því . En ég fór í Storkinn á laugardaginn og kom út með fullan poka af garni, eins og ég geri reyndar oft þegar ég fer í þá fínu búð. Ég er byrjuð á peysu á mig sem ég er búin að hafa í kollinum á mér lengi. Röndótt skal það vera, í haustlitunum brúnu. Svo var ég að breyta peysu sem ég prjónaði síðasta haust, setti í hana rennilás og þar með er ég búin að fá nýja peysu.
Svo keypti ég líka garn í teppi handa litla krúttinu sem er á leiðinni og ég get varla beðið með að byrja á því.

Vattarsaumur

2007-07-19T09:47:00.000Z

Ég fór í gær í ferðalaginu okkar á Eiríksstaði á leiðinni frá Búðardal til Borgarfjarðar, þar sem Eiríkur rauði á að hafa búið. Þar var tjald fyrir framan bæinn þar sem kona ein sat og vattarsaumaði og var svona líka almennileg. Hún kenndi mér að vattarsauma og ég keypti af henni nál og er dottin í þetta. Þar voru vettlingar sem maðurinn hennar saumaði alveg ótrúlega flottir. Takmarkið er að gera eina slíka og er ég byrjuð á þeim. Ég ætla að reyna að skella inn mynd af þeim á eftir. Þetta er ótrúlega gaman.

Pilsið er tilbúið

2007-07-14T16:05:00.000Z

Jæja þá kláraði ég pilsið í dag og verð bara að fara að komast í bæinn og kaupa mér meira garn. Ég þarf alltaf að hafa eitthvað á prjónunum annars verð ég óróleg.

Pilsið fína

2007-07-13T10:36:00.000Z

Nú er pilsið sem Guðrún María fær að verða tilbúið. Þetta eru bara afgangar sem ég nota og verður þetta fína pils. Ég vona að hún vilji vera í því en það á eftir að koma í ljós. Ég studdist við uppskriftina úr fínu barnaprjónabókinni sem ég keypti í skólavörðubúðinni og heitir Pindevenner og er mjög girnileg að mínu mati.

Húfur á börnin

2007-07-11T22:38:00.000Z

Þetta eru ótrúlega sætar húfur sem ég prjónaði um daginn, var ekki lengi með hverja. Ég sá þær í Storkinum og fannst þær ótrúlega krúttlegar. Eiginlega eru þetta nátthúfur í uppskriftinni en maður notar nú ekki mikið nátthúfur. Ég vona að það heppnist núna að setja inn mynd af húfunum. Þetta var nú meira baslið með myndina af grænu peysunni.

Ein tilraun enn

2007-07-11T14:29:00.000Z

Þetta skal takast

Þetta með myndina

2007-07-10T08:26:00.000Z

já þetta með myndina heppnaðist ekki alveg. Ég þarf greinilega að studera það eitthvað betur.

Mynd af grænu peysunni

2007-07-10T08:13:00.000Z

hér ætla ég að reyna að setja inn mynd af fínu grænu peysunni sem Guðmundur og Þura eiga að fá....

2007-06-17T10:57:00.000Z

Ég er alveg að verða búin með grænu peysuna sem verður mjög fín held ég. Ég ætla að reyna að setja myndir inn af henni fljótlega.

Fyrsta færslan

2007-06-03T23:33:00.000Z

Jæja nú er prjónabloggið komið, loksins.